بقلم حسنية محمد

تعرف يا حازم الحياة دي لازم تكون مشاركة بين اتنين مينفعش الحمل كله يبقى على واحد بس عشان الحمل تقيل ومحتاج اتنين يشيلوه يمكن تكون أروى مش نصيبك بس لما تحب حد لازم تحسسه إنه جميل فى عين نفسه متخليش الناس تاخد جانب مهم فى حياتكوا لأنكم مهما عملتوا الناس بردو بتتكلم رضا الناس غاية لاتدرك يا بني كل واحد فينا محتاج حد يحسسه إنه فخور بيه لمجرد إنه بيحاول مش عشان حقق حاجة أو نجح فى حاجة! لأ عشان الدعم المستمر والحنية في كل الأوقات شيء عظيم ومش بيعملهم إلا الناس العظيمة بيخلق حب وثقة فى النفس ملهاش حدود بتخليك تبقى عايز تجيب حتة من السما للشخص ده وتقوله ثقتك فى محلها وشكرا لوجودك معايا اقنعه دايما إنه شخص عظيم.
يا عمي أنا عارف وفاهم كل دا بس حاول تحط نفسك مكاني كنت هتعمل إيه
وأحط نفسي مكانك ليه وأنا مريت بموقف شبيه لموقفك!
رد باستغراب بجد!
بجد.
وحضرتك تعايشت واتأقلمت ولا مقدرتش
بفضل الله اتأقلمت وتعايشت عشان كلام الناس كان في الأرض بالنسبالي.
وإيه هو الموقف ده
هحكيلك أروى دى نتيجة صبري في الدنيا أنا وأمها تعتبر جبر وعوض من ربنا لقلوبنا احنا قعدنا تلات سنين مش بنخلف ودوخنا على دكاترة كتير وكل دكتور كان بيأكد لنا إنه مفيش حاجة وإنها شوية وقت مش أكتر ياما ناس قالولي اتجوز واحدة تجيبلك عيال ناس غلابة أوى مش قادرين يفهموا ان العيب مش مننا لا هى فيها حاجة ولا حتى أنا! لكن أنا وقتها وقفت فى وشوش كل الناس وقولتلهم لو أنا عايز عيال هيكونوا منها هى غير كده الله الغني عنهم 
وبفضل الله ربنا رزقنا ب أروى لكن بعد ما اتولدت والدتها تعبت جدا واضطرت إنها تشيل الرحم هل الناس سكتت لا خالص بالعكس قعدوا يقولوا اتجوز واحدة تجيبلك الولد لكن أنا كنت رافض حتى لما هى جت وقالتلى أنا راضية إنك تتجوز عادى كنت عارف إنها بتقول الكلام ده من ورا قلبها ومن ضغط وكلام الناس علينا قولتلها أنا مش هلاقي واحدة زيك تتحملني وقت عصبيتي ولا تشيلني وقت تعبي وبعدين الحمد لله إن ربنا رزقنا احنا أحسن من غيرنا كتير أما كلام الناس اعتبريهم تراب بتمشي عليه ومش تديلهم أي أهمية في حياتنا أنا بحبك أنت وعنيا مش شايفة غيرك ومن يومها وهى شايلاني على كفوف الراحة والله ومن وقت ما أروى جت على الدنيا والخير مالي بيتنا 
ف اللي عايز أوصله ليك إن الكلام الحلو بيفرق جدا قادر يغير نفسية شخص مكتئب لشخص مبهج يخليك تبتسم من غير سبب الكلام الحلو بيطبطب على القلب بيفتح النفس ويخلي أفكارك إيجابية جدا متبطلش تقول كلام حلو لأى شخص لو مش هتقدر تساعد اللي قدامك بأى شيء ف كفاية إنك تحاول تساعده معنويا بكلام لطيف.
موقفي غير موقفك يا عمي كل واحد وله قدرة على تحمل حاجة معينة وأنا شخص مش هيقدر يتأقلم في الوضع ده ولا حد في منصبي هيقدر يتأقلم.
رد بابا بيأس وقال عموما أنا كده وصلت رسالتي يا بني أتمنى تلاقى شريكة حياتك اللي بتتمناها واللي الناس بيتمنوها لك ياحضرت الرائد.. دلوقتي أناديلك أروى تديك حاجتك.
قبل ما أدخل لقيت ماما طبطبت عليا وقالتلي كلام اتزرع فى قلبي
اللي يتعوض متزعليش عليه يا بنتي.
طيب واللي ميتعوضش 
صاحب